இடுகைகள் பரிந்துரை ?

December 28, 2008 · Posted in அறிவிப்புகள் · 13 Comments 

Tamilmanam Blog Awards questions and answers

1. விருதுகள் 2008ன்னு அறிவிச்சிட்டு 2006ல எழுதுன இடுகைகளையும் பரிந்துரைப்பக்கத்தில காண்பிக்கறீங்க?
2. தவறுதலா நடந்தது இப்போ சரிசெய்யப்பட்டிருக்கு. ஏற்கனவே பழைய இடுகைகளை பரிந்துரை செஞ்சவங்க மறுபடியும் சரியான இடுகைகளை தெரிவு செய்ய வேண்டியதிருக்கும்.

1. சரி செய்யப்பட்டதில ஒரு சில இடுகைகள் ரெண்டு மூணு தடவை தெரியுதே?
2. அப்படி ஒரு வழு இருக்கறது தெரியும். அதனால எந்த சிக்கலும் இல்லை. இப்போதைக்கு அது அப்படியே தான் தொடரும்

1. விருதுகள் -2008க்கு பதிவர்களோட பங்களிப்பு எப்படி இருக்கு.
2. நல்லாவே இருக்கு.

1. இதுவரைக்கும் பரிந்துரை செய்யப்பட்ட இடுகைகளைப் பார்க்கலாமா?
2. வாக்களிப்புக்கு முன்னாடியே பொதுப்பார்வைக்கு வைக்கலாமான்னு ஒரு விவாதம் நடந்துக்கிட்டு இருக்கு. அனேகமா முன்னாடியே பொதுப்பார்வைக்குக் வைப்போம்.

1. விருதுகள் நடைமுறையில பதிவர்கள் சிலபேர் சிக்கல்கள் இருக்கறதா சொல்லியிருக்காங்களே?
2. விருதுகள் நடைமுறை பற்றிய தங்களோட கருத்துக்களையும், சிக்கல்களையும் எங்களுக்கு அறியத் தந்த பதிவர்களுக்கு நன்றி. கூடுமானவரைக்கும் எல்லா சிக்கல்களையும் தீர்க்க முயற்சி செய்துகிட்டு இருக்கோம். இப்போ குழுவில எல்லாரும் விடுமுறையில இருக்கறதால பதிவர்களுக்கு பதில் சொல்றதுலயும், சிக்கல்களை களைவதிலும் அதிகமான காலதாமதம் இருக்கு.

1. பதிவர்கள் விருதுகள் குழுவினரை எப்படி தொடர்பு கொள்றது?
2. பின்னூட்டங்கள் மூலமா தொடர்புகொள்ளலாம்னு ஏற்கனவே அறிவிச்சிருந்தோம். அதுபோக admin@thamizmanam.com ன்ற மின்னஞ்சல் முகவரிக்கும் தொடர்பு கொள்ளலாம். அதுலயும் இப்போதைக்கு காலதாமதம் உண்டு. விடுமுறை கால தாமதத்தை பதிவர்கள்
புரிந்து கொள்வார்கள் என நம்புகிறோம்

1. வேற எதாவது சிக்கல் இருந்தா தொடர்பு கொள்ளலாமா?
2. நிச்சயமா. அப்புறம் மறந்துடாம உங்களோட இடுகைப் பரிந்துரையையும் செஞ்சிடுங்க.

தமிழ்மணம் விருதுகள் 2008 – இடுகைப் பரிந்துரைகள் துவக்கம்

December 25, 2008 · Posted in அறிவிப்புகள் · 21 Comments 

தமிழ்மணம் பதிவர்கள் ஆவலுடன் எதிர்நோக்கிய விருதுகள் 2008 க்கான இடுகைப் பரிந்துரைகள் இன்றுமுதல் துவங்குகின்றன. உங்களது இடுகைப் பரிந்துரைக்கான சிறப்புத் தொடுப்பு, தமிழ்மணத்தில் பதிவு செய்யப்பட்டிருக்கும் உங்களது மின்னஞ்சல் முகவரிக்கு இன்று அனுப்பப்படுகிறது. இம்மின்னஞ்சல் தானியங்கியாக அனுப்பப்படுவதால் அம்முகவரியை எவ்விதத்திலும் உபயோகிக்க இயலாது.

மின்னஞ்சல் பெறுவதற்கு உங்களது பதிவு 01-11-2008க்கு முன்னர் தமிழ்மணத்தில் இணைக்கப் பட்டிருக்க வேண்டும். பதிவு செய்யப்பட்டிருக்கும் மின்னஞ்சலை மாற்றுவதற்கான கோரிக்கைகள் தற்சமயம் ஏற்றுக்கொள்ளப் பட இயலாது. எனினும் மின்னஞ்சல் கிடைக்கப்பெறாதவர்கள் பின்னூட்டத்திலோ அல்லது admin@thamizmanam.com எனும் முகவரிக்கோ தொடர்பு கொள்ளலாம். இஃது விடுமுறைக்காலமாதலால் பதிலிறுப்பதில் அதிகமான காலதாமதங்கள் ஏற்பட வாய்ப்புண்டு.

இடுகைப் பரிந்துரைகள் இன்று தொடக்கம் 07-01-2009 வரையான கால இடைவெளியில் ஏற்றுக்கொள்ளப்படும். இடுகைப் பரிந்துரைகள் மற்றும் விருதுத் தெரிவு முறைகள் பற்றிய விரிவான அறிவிப்பு ஏற்கனவே வெளியிடப்பட்டுள்ளது.

பரிந்துரைகள் ஏற்கனவே கூறப்பட்டுள்ளது போல் கீழ்க்காணும் 12 பிரிவுகளுக்கு நடைபெறுகிறது. இதில் ஏதாவது 3 பிரிவுகளுக்கு மட்டுமே உங்களது இடுகைகளைப் பரிந்துரைக்க இயலும்.

1. படைப்பிலக்கியம் (கதை, கவிதை, போன்றவை)
2. காட்சிப் படைப்புகள் (ஓவியம், ஒளிப்படம், திரைப்படம்)
3. நூல், திரைப்படம் அறிமுகம்/திறனாய்வுகள்
4. அறிவியல், பொருளாதாரம், தொழில்நுட்பக் கட்டுரைகள்
5. பயண அனுபவங்கள், ஊர்/வாழ்வு நினைவோடைகள்
6. செய்திகள்/நிகழ்வுகளின் அலசல்கள்
7. அரசியல், சமூக விமர்சனங்கள்
8. பெண்கள் பிரச்னைகள், திருநங்கைகள் வாழ்வியற் சிக்கல்கள், தலித்திய சிக்கல்கள்
9. ஈழ மக்களின் சமூக-பொருளாதாரச் சிக்கல்கள்
10. தமிழ் மொழி, கலாச்சாரம், வரலாறு, தொல்லியல்
11. நகைச்சுவை, கார்ட்டூன்
12. சுயதேடல், பகுத்தறிவு, ஆன்மீகம்.

ஒவ்வொரு பிரிவிலும் முதலிரண்டு இடங்களைப் பெரும் இடுகைகள் வெற்றி பெற்றவையாக கருதப்படும். வெற்றி பெரும் பதிவர்கள் உபயோகித்துக் கொள்ளும் வகையிலான மாதிரிப் பதக்கம் இத்துடன் இணைக்கப்பட்டுள்ளது.

தமிழ்மணம் வலைப்பதிவு விருதுகள் 2008

விருதுகள் நிகழ்வுகள், வலைப்பதிவுகள் எனும் ஊடகத்தை மிகச்சிறந்த முறையில் பயன்படுத்துவதை ஊக்குவிக்கவும், பொதுவெளியில் வலைப்பதிவுகளின் தாக்கத்தினை அதிகரிக்கவுமான ஒரு ஆக்கப்பூர்வமான நிகழ்வு மட்டுமே. இதைக் கருத்தில் கொண்டு தமிழ்மணம் விருதுகள் 2008ல் ஒவ்வொரு பதிவரினதும் சிறந்த இடுகைப் பரிந்துரைகளை ஏனைய பதிவர்கள் போல் தமிழ்மணம் குழுவினரும் மிக்க ஆவலுடன் எதிர்நோக்குகிறோம்.

புரிந்துணர்வுடன் தொடரும் உங்களின் ஒத்துழைப்புக்கு நன்றி.

தமிழ்மணம் விருதுகள் 2008 – ஒருங்கமைப்புக் குழு

சூடான இடுகைகள் செம்மையாக்கம்

December 24, 2008 · Posted in அறிவிப்புகள் · 50 Comments 

தமிழில் வலைப்பதிவுகள் பெருக வேண்டுமென்றும், அனைத்துத் தரப்பு வாதங்களும் ஆரோக்கியமாக இடம் பெறும் ஊடகமாக வலைப் பதிவுகள் இயங்க வேண்டுமென்றும் தமிழ்மணம் விரும்புகிறது. அந்த நோக்கத்துடனேயே வலைப்பதிவுகளைத் திரட்டி இற்றைப் படுத்தித் தமிழ்மணத்தின் வெவ்வேறு பகுதிகளில் தருகிறது.

சூடான இடுகைகள், வாசகர்கள் எதனை அதிகம் வாசிக்கிறார்கள் என்பதன் ஒரு குறியீடு மட்டுமே. அதேநேரத்திலே தமிழ்மணம் சூடான இடுகைகளில் தொடர்ந்து இடம் பெற வேண்டுமென்ற நோக்கத்துக்காகவே போடப்படும் பதிவுகள் அதிகரித்த நிலையிலே இந்த வசதியில் சில மாற்றங்களைக் கொண்டு வந்திருக்கிறோம். இந்த மாற்றங்கள் தற்பொழுது சோதனையில் உள்ளன.

அது தவிர தமிழ்மணத்தின் சேர்க்கை விதிகளுக்கு முரண்பட்ட சில பதிவுகளும் சூடாக்கும் பரபரப்புக்காக மட்டுமே தலைப்பிடும் சில பதிவர்களின் பதிவுகளும் தற்போது சூடான இடுகைகளிலிருந்து விலக்கப்பட்டிருக்கின்றன.

தொடர்ந்து எழுதப்படும் இப்படியான பதிவுகளை வடிகட்டுவது மட்டுமின்றி், வேறு நுட்ப முறைகளிலும் கையாள்வது பற்றித் தமிழ்மணம் விவாதித்து வருகிறது. இதற்கான வடிகட்டுச் சொற்களைத் தொடர்ந்து் தமிழ்மணம் மேம்படுத்தி வரும் என்பதையும் தெரிவித்துக் கொள்கிறோம். இனி சூடான இடுகைகள் என்பது அதிகம் படிக்கப்படும் இடுகைகள் என்பது மட்டும் அல்ல, இந்த நுட்பங்களின் வழியாகவும் தெரிவு செய்யப்படும் இடுகைகள் ஆகும்.

இவை தவிர தொழில்நுட்ப அளவில் இன்னும் பல மாற்றங்களை படிப்படியாகச் செயல்படுத்த இருக்கிறோம். இதற்கான ஆலோசனைகளைப் பதிவர்களும் எமக்கு அளிக்கலாம்.

நிர்வாகம்,
தமிழ்மணம்

தமிழ்மணம் வலைப்பதிவு விருதுகள் – 2008 – விரிவான அறிவிப்பு

இவ்வாண்டின் மிகச்சிறந்த இடுகைகளை தெரிவு செய்யும் பதிவுத் திருவிழா

தமிழ் வலைப்பதிவுகள் எண்ணிக்கையிலும் தரத்திலும் வளர்வதற்கும், அவை பரவலான வாசகர்களைச் சென்றடையவும் தேவையான கட்டமைப்பை அளிப்பதையும், வழமையான ஊடகவெளிக்கு வெளியே வலைப்பதிவுகளில் எழுதப்படும் தரமான படைப்புகள் உரிய அங்கீகாரம் பெறவும், அதன் மூலம் அத்தகைய படைப்புகள் மேலும் அதிகரிக்கவும் தன்னாலானதைச் செய்வதையுமே தமிழ்மணம் தன் அடிப்படையான பணிகளாகக் கொண்டுள்ளது.

தமிழ்மணத்தின் அடிப்படை நோக்கங்களின் மீது நம்பிக்கை வைத்து இயங்கும் வலைப்பதிவர்களுக்கு நன்றி செலுத்துமுகமாக தமிழ் வலைப்பதிவுகளுக்கென்று விருதுகள் ஏற்படுத்தும் திட்டம் சென்ற ஆண்டே அறிவித்திருந்த போதிலும் அதனை செயல்படுத்த முடியாமல் போனது. இந்த ஆண்டு தொடக்கம், இனி ஒவ்வொரு ஆண்டும் தமிழ்மணத்தில் வெளியாகும் சிறந்த இடுகைகளை தேர்ந்தெடுத்து அவ்வாண்டின் இறுதியில் விருதுகள் வழங்கப்படும்.

இனி ஒவ்வொரு ஆண்டும் டிசம்பர்-சனவரி மாதத்தை தமிழ்மணம் விருதுகள் மாதமாக பதிவர்கள் குறித்து கொள்ளலாம்.

ஒவ்வொரு பதிவரும் தன்னுடைய பதிவே சிறந்தது எனப் பெருமிதம் கொள்ளும் உரிமையைப் பெற்றிருந்தாலும், இடுகைகளுக்கு உடனுக்குடன் கிடைக்கும் சக பதிவர்கள்/வாசகர்களின் பின்னூட்டங்கள் மூலமான அங்கீகாரமும் பதிவர்களை மேலும் ஊக்குவிக்கும் சக்தியாகத் திகழ்கிறது. அப்படிப்பட்ட இடுகைகளை வாசகர்கள் மீண்டுமொருமுறை திரும்பிப் பார்க்க வைத்து அங்கீகரிப்பதே இந்த விருதுத் தேர்வுக்கான அடிப்படை. அறிவிக்கப்பட்ட போட்டிகளுக்காக எழுதப்படும் படைப்புகளாக அல்லாமல், தன்னெழுச்சியாக வெளிப்பட்ட படைப்புகளே இந்தத் தேர்வுகளுக்கு கணக்கிலெடுக்கப்படுவதால் இதில் போட்டியோ, ஏமாற்றமோ ஏற்படுவதற்கான வாய்ப்புகள் குறைவாக இருக்குமென்றே நம்புகிறோம்.

இவ்வாண்டின் தேர்வுகள் கீழ்காணும் பிரிவுகளில் இருக்கும்:

1. படைப்பிலக்கியம் (கதை, கவிதை, போன்றவை)
2. காட்சிப் படைப்புகள் (ஓவியம், ஒளிப்படம், திரைப்படம்)
3. நூல், திரைப்படம் அறிமுகம்/திறனாய்வுகள்
4. அறிவியல், பொருளாதாரம், தொழில்நுட்பக் கட்டுரைகள்
5. பயண அனுபவங்கள், ஊர்/வாழ்வு நினைவோடைகள்
6. செய்திகள்/நிகழ்வுகளின் அலசல்கள்
7. அரசியல், சமூக விமர்சனங்கள்
8. பெண்கள் பிரச்னைகள், திருநங்கைகள் வாழ்வியற் சிக்கல்கள், தலித்திய சிக்கல்கள்
9. ஈழ மக்களின் சமூக-பொருளாதாரச் சிக்கல்கள்
10. தமிழ் மொழி, கலாச்சாரம், வரலாறு, தொல்லியல்
11. நகைச்சுவை, கார்ட்டூன்
12. சுயதேடல், பகுத்தறிவு, ஆன்மீகம்.

தேர்வு நடைமுறை:

1. தனிப்பட்ட இடுகை (post) அல்லது இடுகைத் தொடர்களே விருதுக்கு தேர்வு
செய்யப்படும். வலைப்பதிவு முழுமைக்குமான விருது என்று எதுவும் இல்லை.

2. கலந்து கொள்ளும் பதிவர், தனது பதிவினை 1-11-2008க்கு முன்னர் தமிழ்மணத்தில்
இணைத்திருத்தல் வேண்டும்.

3. எந்தவொரு இடுகையையும் எழுதிய பதிவரே பரிந்துரை செய்யவேண்டும். ஒரே பதிவர்
அதிகபட்சமாக மூன்று வெவ்வேறு பிரிவுகளுக்குப் பரிந்துரை செய்யலாம். ஆனால் ஒரு
பிரிவுக்கு ஒரே ஒரு இடுகையை மட்டுமே பரிந்துரை செய்ய முடியும். மேலும்
குறிப்பிட்ட இடுகையை ஒரு பிரிவுக்கு மட்டுமே பரிந்துரை செய்யலாம்.

4. உங்களது பரிந்துரைகளை அளிப்பதற்கென ஒரு சிறப்புத்தளம் ஏற்படுத்தப்
பட்டுள்ளது. அதற்கான சிறப்புத் தொடுப்பும் வழிமுறைகளும் தமிழ்மணத்தில்
பதியப்பட்டுள்ள பதிவர்களின் மின்னஞ்சல் முகவரிக்கு அனுப்பப்படும்.

5. பரிந்துரைக்கப்படும் படைப்புகள் 2008 ஆம் ஆண்டில் முதல் முறையாகப்
பதிவுகளில் எழுதப்பட்டிருக்கவேண்டும். பரிந்துரைகள் 2008 ஆண்டில் வெளியிடப்பட்ட
முந்தைய ஆண்டுகளின் படைப்புகளின் மீள்பதிவுளாகவோ அல்லது வேறு அச்சிதழ் அல்லது
இணைய தளங்களில் வெளியிடப்பட்ட படைப்புகளின் மீள்பதிவுகளாகவோ இருத்தலாகாது.

6. விருதுத் தேர்வுக் குழு (நடுவர் குழு) என்று எதுவும் இல்லை.தமிழ்மணத்தில்
இணைந்துள்ள அனைத்துப் பதிவர்களும் முதற்கட்ட நடுவர்களே. ஒரு பதிவருக்கு ஒரு
பிரிவுக்கு ஒரு வாக்கு என்னும் அடிப்படையில் வாக்குரிமை இருக்கும்.

7. முதற்கட்ட வாக்கெடுப்பில் ஒவ்வொரு பிரிவிலும் முதல் 10 இடங்கள் பெறும்
இடுகைகள் இரண்டாம் கட்டப் பொது வாக்கெடுப்புக்குத் தெரிவு செய்யப்படும்.
இரண்டாம் கட்டத்தில் அனைத்து வாசகர்களும் (பதிவு இல்லாதவர்களும்)
வாக்களிக்கலாம்.

8. பதிவர் வாக்குகளும் வாசகர் வாக்குகளும் 2:1 என்ற விகிதத்தில் முக்கியத்துவம்
அளிக்கப்பட்டு மொத்த வாக்குகள் கணக்கிடப்படும். இதில் முதலிடம் பெறும் இடுகை
அந்தந்தப் பிரிவில் 2008-இன் சிறந்த இடுகையாக அறிவிக்கப்படும்.

9. ஒவ்வொரு பிரிவிலும் முதல் கட்ட வாக்கெடுப்பில் தெரிவு செய்யப்படும் முதல் 10
இடுகைகளும் (மொத்தம் 120 இடுகைகள்), தமிழ்மணம் தளத்தில் புதிதாக
உருவாக்கப்படும் சிறப்புப் பக்கத்தில் நிரந்தரமாக இடம் பெறும். தமிழ்மணம் புகழ்
அரங்கு (Hall of Fame) என்ற இந்தப் பக்கம் ஒவ்வொரு வருடமும்
தேர்ந்தெடுக்கப்படும் சிறந்த இடுகைகளை நிரந்தரமாக முன்னிறுத்தும்.

10. தமிழ்மணத்தில் இணைந்துள்ள பதிவர்களுக்குப் பரிந்துரைகள் அனுப்புவதற்கான
வேண்டுகோள் வெளியிடப்படுவதுடன் விருது தெரிவுப் பணி தொடங்கும்.
பரிந்துரைகளுக்கான காலகட்டம் 10 நாட்கள், முதற்கட்ட வாக்கெடுப்புக்கு 5
நாட்கள், இரண்டாம் கட்ட வாக்கெடுப்புக்கு 5 நாட்கள் அளிக்கப்பட்டு பொங்கல்
நாளில் விருது அறிவிப்பு வெளியாகும். பரிந்துரைகள் தொடங்கும் நாள் டிசம்பர் 25.
ஒவ்வொரு கட்டத்திலும் விரிவான அறிவிப்புகள் தமிழ்மண முகப்பில் வெளியிடப்படும். மின்னஞ்சலிலும் பதிவர்களுக்கு அறிவிக்கப்படும்.

பரிசு:
வாக்கெடுப்பில் ஒவ்வொரு பிரிவிலும் அதிக வாக்குப் பெற்று முதலிடம் பெறும்
பதிவுகளுக்குத் தலா ரூ.500ம் (ஐநூறு), இரண்டாம் இடம் பெறும் பதிவுகளுக்குத் தலா
ரூ.250ம் (இருநூற்றி ஐம்பது) வழங்கப்படும். இவை பணமாகவோ, அதன் மதிப்பான
புத்தகங்களாகவோ வழங்கப்படும்.

-தமிழ்மணம் விருதுத் தேர்வு ஒருங்கமைப்புக் குழு