தமிழ்மணம் நுட்ப உதவிக்குழு

தமிழ்மணம் போன்றதொரு தளத்தினைப் பயன்படுத்த ஆரம்ப காலத்தில் இருந்தே நுட்ப உதவிக்கென்று ஒரு வழிமுறை இருப்பது அவசியமாக இருந்தது. இதற்குக் காரணங்கள் பல.

ஒன்று, வலைப்பதிவுகளின் ஆரம்ப காலத்தில் பெரும்பாலும் கணினி, மென்பொருள், மற்றும் பொறியியற் துறைகளைச் சார்ந்தவர்களே அதிகம் இருந்தனர் என்றாலும், நாளடைவில் இணைய வளர்ச்சியின் பரவலாலும், இணையத்தில் தமிழ்ப் பயன்பாடு வளர்ந்தமையாலும், வலைப்பதிவுகளும் இன்ன பிற இணைய வசதிகளும் பலதரப்பட்ட பயனர்களையும் சென்றடைந்தது. ஆனால், எல்லோருடைய பின்புலமும் வெவ்வேறானதாக இருந்தமையால் அவர்களுக்குத் தேவைப்பட்ட நுட்ப விளக்கங்களும் வேறு வேறு விதமான அளவில் இருந்தன. இன்றும் இருக்கின்றன.

காட்டு: “செய்தியோடை” என்றால் என்ன? என்னும் கேள்விகள் கூட இன்னும் வந்துகொண்டிருக்கும் நிலையில் இது இயல்பானதொன்றே என்று எடுத்துக் கொள்கிறோம். இதற்கெனவே வலைப்பதிவு நுட்பங்களின் அடிப்படை மற்றும் தமிழ்மணம் திரட்டியில் இணைந்து கொள்வது போன்ற அடிப்படை விளக்கங்களுக்குச் சில பக்கங்களை ஏற்படுத்தி இருக்கிறோம். இவை எல்லோருக்கும் தேவையானவை அல்ல. ஆனால், இன்னும் இவற்றிற்கான தேவை இருக்கிறது.

இரண்டு, இணையமும், நுட்பங்களும் அதிவேகமாக மாறி வரும் வேளையில் இயன்றவரை அவற்றைத் தமிழ்மணத்தில் சேர்க்க முயல்கிறோம். சிலவற்றைச் சேர்த்தும் பிறவற்றை விலக்கியும் மாற்றங்களை எப்போதும் கொண்டிருப்பதால் சிலசமயம் அவற்றைத் தெளிவு செய்துகொள்வதற்கான தேவையும் பயனர்களுக்கும் இருக்கிறது.

காட்டாக, செய்தியோடைகளை அடிப்படையாக வைத்தே திரட்டி நுட்பம் இயங்குகிறது என்பது பலரும் இன்று அறிந்த ஒன்றே. ஆனால், சில ஆண்டுகளுக்கு முன்னர், முக்கியமான வலைப்பதிவுச் சேவையான பிளாக்கர், தனது இயல்பான செய்தியோடை முகவரியை மாற்றியது. http://dharumi.blogspot.com/atom.xml என்பது போல இருந்தவை http://tamilamudam.blogspot.com/feeds/posts/default என்பது போன்ற வடிவத்திற்கு மாறியது (மேற்சுட்டிய தளங்கள் தற்செயலானவை). அதோடு, பழைய பிளாக்கர், புதிய பிளாக்கர் என்று இரண்டும் சிறிது நாட்களுக்கு ஒருசேர இயங்கியது. சிக்கல் என்னவென்றால் தமிழ்மணத்தின் பல வசதிகளை வழங்கிவந்த கருவிப்பட்டை நிரல் முற்றிலுமாக மாற்றியமைக்கப் படவேண்டியிருந்த்து. இதனைச் செய்ய வழிமுறைகளை அறிவித்தாலும், ஆரம்பத்தில் அது சற்றே சிக்கலுக்குரியதாக இருந்த்து. இதையே பின்னாளில் எளிதாகச் சேர்த்துக் கொள்ளும் நுட்பத்தைச் சில பதிவர்களே செய்துதவினர். (இப்படியான கருவிப்பட்டையே இன்றைய நாளில் தேவை தானா என்னும் கேள்வியும் பதிவர்கள் இடையேவும் தமிழ்மண நிர்வாகத்திலும் எழுந்திருக்கிறது. அது வேறு கேள்வி. அதனைப் பின்னர் பார்ப்போம்).

இதுவே, அண்மையில் பிளாக்கர் ஃபீட்பர்னர் ஓடையையும் பாவிக்கத் தொடங்கியதில் இருந்து, ஃபீட்பர்னருக்கு இயல்பான ஓடையை வழிமாற்றிவிடுவதால் திரட்டிக்குச் சிக்கல் ஏற்படுகிறது என்பதைப் பலருக்கும் விளக்க வேண்டியிருக்கிறது. ஃபீட்பர்னர் ஓடையைக் கூடுதலாக வைத்துக் கொள்வது பிரச்சினையில்லை. ஆனால் இயல்பாய் உள்ள ஓடையை வழிமாற்றுவதில் சிக்கல்கள் உள்ளன. இவற்றை எல்லாம் முற்றிலும் அறிந்துணர தமிழ்மணம் நிர்வாக்க் குழுவிலும் சிலரேனும் நிறைய நேரம் செலவிட்டுத் தெரிந்து கொள்ள வேண்டியிருக்கிறது. எல்லா நுட்பங்களையும் எல்லாச் சமயங்களிலும் தெளிவாக விளக்கிச் சொல்ல இயலாத நேரங்களில் சிலசமயம் பதிவர்கள் உதவுகின்றனர். இந்த பீட்பர்னர் பிரச்சினை குறித்து நுட்ப உதவி கேட்டு வரும் மடல்களுக்குக் கீழ்க்கண்ட பரிந்துரையை அனுப்புகிறோம்.

1. Remove redirection to feedburner feeds. OR
2. See: http://tvs50.blogspot.com/2009/06/feedburner-rss-feeds-vs-tamilmanam.html
Also See: http://ethirneechal.blogspot.com/2010/12/tamilmanam.html

மூன்று, சிலசமயங்களில் சில காரணங்களால் சில வசதிகள் அறிவித்தது போல் வேலை செய்யாது போகலாம். அதற்கும் பல காரணங்கள் உண்டு. தற்காலிகமாக வழங்கியின் பளு அதிகமாகித் தளம் தொய்வடைவதுண்டு. இதனைச் சரிசெய்ய நாளடைவில் மேலும் அதிகச் சக்தி வாய்ந்த வழங்கிகளுக்கு மாறிக் கொண்டே வந்திருக்கிறோம்.

அடுத்து, தமிழ்மணம் நிரலில் சிலசமயம் பிழை ஏதும் இருக்கவும் வாய்ப்புண்டு. அவற்றில் சிலவற்றை எளிதாகத் தீர்த்து விடுவதுண்டு. சிலவற்றைச் சரிசெய்வது எளிது தான் என்றாலும் நேரம் இன்மையால் விட்டுவிடுவதுண்டு. இது போன்றவற்றிற்கும் வழிமாற்று முறைகளையும் பிற விளக்கங்களையும் நுட்ப உதவிக்குழுவிற்கு வரும் மடல்களின் வாயிலாகச் செய்து வருகிறோம்.

இயன்றவரை உதவிக்குழுவிற்கு வரும் ஒவ்வொரு மடலுக்கும் பதில் அனுப்ப முயல்கிறோம். சில சமயம் தாமதம் ஆகிவிடுவதுண்டு என்றாலும், அநேகமாக 99% மடல்களுக்குப் பதில் அனுப்பி விடுகிறோம் என்பதையே ஒரு சாதனையாகக் கருதுகிறோம். இதிலும் வேடிக்கையும் வேதனையுமான சவால்களைச் சந்திக்க வேண்டியிருக்கிறது. அவை பற்றிப் பிறகு.

தமிழ்மணம் தொழில்நுட்ப கேள்வி பதில்கள்

தமிழ்மணம் இணைத்தளம் தமிழின் முதல் இணையத்திரட்டியாக 2004ல் தொடங்கப்பட்டது. 2006ல் இருந்து தமிழ்மணத்தை தமிழ் மீடியா இண்டர்நேசனல் நிறுவனம் நடத்தி வருகிறது. தமிழ்மணத்தினை தொடர்ந்து தமிழின் முதன்மையான இணையத்திரட்டியாக தக்கவைப்பதற்கு தமிழ் மீடியா இண்டர்நேசனல் நிறுவனம் தன்னாலான
முயற்சிகளை தொடர்ந்து செய்து வந்திருக்கிறது. கடந்த ஐந்து ஆண்டுகளாக தமிழ்மணத்தின் தொழில்நுட்பத்தில் பல்வேறு புதிய சேவைகளை தொடர்ந்து அறிமுகம் செய்து வந்திருக்கிறோம். தமிழ் வலைப்பதிவுகளுக்கு வேறு எந்த மொழியிலும் இல்லாத அளவுக்கு பல்வேறு வசதிகளை தமிழ்மணம் வழங்கி வருகிறது. அதே நேரத்தில் தமிழ்மணத்தின் சேவையை இதை விட இன்னும் மேம்படுத்தி கொடுக்க இயலும். தமிழ்மணத்திலேயே இன்னும் பல தொழில்நுட்ப குறைகள் இருக்கத்தான் செய்கின்றன என்பதை நாங்கள் உணர்ந்தும் இருக்கிறோம். என்றாலும் லாப நோக்கு இல்லாத தன்னார்வ நிறுவனமாக தமிழார்வளர்களின் பகுதி நேரப் பணியில் செயல்படும் தமிழ்மணம் எதிர்கொண்ட/எதிர்கொண்டு வருகின்ற சவால்களும் ஏராளம். இந்த சவால்களுக்கு மத்தியில் தான் எங்களால் வழங்க முடிந்த புதிய சேவைகளை அறிமுகப்படுத்தி வருகிறோம்.

இந்த நட்சத்திர வாரத்தில் தமிழ்மணம் சார்ந்த பல்வேறு விடயங்களை முன்வைக்க இருக்கிறோம். அதன் ஒரு பகுதியாக இந்த இடுகையில் தமிழ்மணம் செயல்படும் தொழில்நுட்பம் குறித்து ஒரு சுருக்கமான அறிமுகத்தை வழங்குகிறோம். இதன் மூலம் தமிழ்மணம் எவ்வாறு செயல்படுகிறது என்பதை புரிந்து கொள்ள இயலும்.

தமிழ்மணம் நிர்வாகத்திற்கு வருகின்ற பலக் கேள்விகள் தமிழ்மணத்தின் சூடான இடுகைகள், தமிழின் முன்னணி இடுகைகள் போன்ற சேவைகள் தமிழ்மண நிர்வாகத்தால் தேர்ந்தெடுக்கப்படுவதாக பலர் நினைப்பதை எங்களுக்கு தெரிவிக்கிறது. தமிழ்மணத்தின் அனைத்து சேவைகளும் தானியங்கியாகவே செயல்படுகின்றன. தமிழ்மணத்தின் எந்தச் சேவையிலும் மனிதத் தலையீடு இருப்பதில்லை. பதிவுகளை திரட்டுதல் தொடங்கி தமிழின் முன்னணி இடுகைகளை பட்டியலிடுவது வரை அனைத்தையுமே தமிழ்மணம் தானியங்கியாக தான் வழங்குகிறது.

இன்று பதிவுகளின் எண்ணிக்கை பத்தாயிரத்தை எட்டும் நிலையிலும் தமிழ்மணம் பதிவுகளை தானியங்கியாக திரட்டுகிறது. தமிழ்மணம் திரட்டி தினமும் பல ஆயிரம் பதிவுகளின் செய்தியோடைகளை திரட்டி அதில் இருந்து சமீபத்தில் எழுதப்பட்ட இடுகைகளை தமிழ்மணத்தின் முன் பக்கத்திற்கு கொண்டு வருகிறது. ஒரு நாளில்
தமிழ்மணத்தில் தற்பொழுது 500 இடுகைகள் எழுதப்படுகின்றன. இந்த 500 இடுகைகளை அவற்றின் குறிச்சொல் கொண்டு இசை, நகைச்சுவை, சினிமா, அரசியல் என தமிழ்மணம் திரட்டி பல்வேறு பிரிவுகளில் வகைப்படுத்துகிறது. அது மட்டுமில்லாமல் ஒவ்வொரு இடுகையும் பெறும் மறுமொழிகளின் எண்ணிக்கை தமிழ்மணம்
முகப்பில் தொகுக்கப்படுகிறது. அது தவிர மறுமொழித் திரட்டி மூலம் அனைத்து மறுமொழிகளையும் வாசிக்க முடியும். மறுமொழித் திரட்டி தமிழ்மணத்தின் முக்கிய சேவையாக இருந்து வருகிறது. பதிவுகளை திரட்டுவதை விட மறுமொழிகளை திரட்டுவது சவால் நிறைந்தது. தமிழ்மணம் வழங்கிக்கு அழுத்தம் கொடுக்ககூடிய இந்தச் சேவையை தமிழ்மணம் தொடர்ந்து வழங்கி வருகிறது. தமிழ்மணம் வழங்கிக்கு பாதிப்பு ஏற்படாதவண்ணம் இந்த தொழில்நுட்பம் அமைக்கப்பட்டுள்ளது.

செய்தியோடைகள்
தமிழ்மணம் செய்தியோடைகளை (RSS Feed) அடிப்படையாகக் கொண்டு செயல்படுகிறது. செய்தியோடையில் செய்யப்படும் எந்த வகை மாற்றமும் தமிழ்மணம் பதிவுகளை திரட்டுவதை பாதிக்கும். பல நேரங்களில் பலப் பதிவர்கள் தங்களுடைய பதிவுகள் திரட்டப்படுவதில்லை என்ற குறைகளை முன்வைக்கிற பொழுது அது பெரும்பாலும் அவர்களின் செய்தியோடை சார்ந்த பிரச்சனையாகவே இருக்கிறது. செய்தியோடை மாற்றங்களில் எப்பொழுதும் பதிவர்கள் கவனம் கொள்ள வேண்டும்.

தமிழ்மணம் தொழில்நுட்பம் சார்ந்த பல்வேறு மாறுபட்ட எண்ணங்கள் பதிவர்கள் மத்தியில் இருந்து வருகிறது. நட்சத்திர வாரத்தில் இடுகைகளை வெளியிடுவதோடு நின்று விடாமல் தமிழ்மணத்தின் தொழில்நுட்பம் குறித்த உங்கள் கேள்விகளுக்கு நாங்கள் விடையளிக்க விரும்புகிறோம். இந்த இடுகையின் மறுமொழியில் உங்கள் கேள்விகளை கேட்கலாம். பதில்களை மறுமொழியிலோ, மற்றொரு இடுகையிலோ அளிக்க தயாராக இருக்கிறோம்.

கேள்விகளை கேளுங்கள்…

தமிழ்மணம் தொழில்நுட்பக் குழு

ஐந்தாண்டுகளைக் கடந்து டி.எம்.ஐ நிறுவனமும் தமிழ்மணத்தின் தொடரும் பயணமும்

தமிழ் மீடியா இண்டர்நேசனல் நிறுவனம்

இந்த வாரம் தமிழ் மண நட்சத்திரம் யார் என்று ஆவலுடன் படிக்க வந்திருக்கும் உங்களுக்கு டி.எம்.ஐ நிறுவனமே அந்த இடத்தை எடுத்துக் கொண்டது வியப்பாக இருக்கலாம். தமிழ்மணம் வலைத்திரட்டியைத் திரு. காசி ஆறுமுகத்திடம் இருந்து பெற்று மேலும் பல புதிய வலைப்பதிவு சேவைகளை அளிப்பதற்காக தமிழ் மீடியா இண்டர்நேசனல் நிறுவனம் நிறுவப்பட்டு ஐந்து ஆண்டுகள் நிறைவடைகின்றன. வணிகநோக்கற்ற தன்னார்வத் தொண்டுநிறுவனமாக அமெரிக்காவில் பதிவு செய்யப்பட்டுள்ள டி.எம்.ஐ நிறுவனம் கடந்த ஐந்து ஆண்டுகளில் செய்து வந்துள்ளவற்றையும், எதிர்கொண்ட சவால்களையும் இவ்வார நட்சத்திரப் பதிவுகளில் ஒரு மீள்பார்வை செய்யவிருக்கிறோம். இந்த நட்சத்திர வாய்ப்பைப் பயன்படுத்திக் கொண்டு பதிவர்களுடனான நேரடியாக உறவைப் பேணும் விதமாக இவ்வாரம் தன் நோக்கங்களையும் பணிகளையும் எதிர்காலத்திட்டங்களையும் பகிர்ந்து கொள்கிறது. பதிவர்களும், வாசகர்களும் எங்களுடன் இணைந்து தமிழ்மணத்தை மேலும் சிறப்புற ஆலோசனைகளையும் வழங்க வேண்டுகிறோம்.

மேலோட்டமாக பார்ப்போமாயின், இந்த ஐந்து ஆண்டுகளில் தமிழ்வலைப்பதிவுகளின் எண்ணிக்கையுடன் தொழில்நுட்பரீதியிலும் தமிழ்மணம் பெரும் வளர்ச்சியைக் கண்டிருக்கிறது. அவை பற்றிய விளக்கமான தகவல்கள் அடுத்து வரும் பதிவுகளில் வெளிவரும். தமிழ்மணத்தில் கடந்த ஐந்து ஆண்டுகளில் ஏற்படுத்தப்பட்ட புதிய சேவைகளைப் பற்றி சுருக்கமாக இங்கே காணலாம்.

முதலில் நோக்கமும் குறிக்கோளும் – தமிழ் மீடியா இண்டர்நேசனல் நிறுவனம், அனைத்துத் தரப்புத் தமிழர்களும் சந்தித்து வரும் பொருளாதார, சமூக-அரசியல், கல்வி மற்றும் சுகாதாரப் பிரச்னைகள் குறித்த அறிவையும், விழிப்புணர்வையும் உலகளாவியத் தமிழ் மக்களிடம் வளர்க்க விரும்புகிறது. அரசு, வணிக நிறுவனங்கள் மற்றும் தன்னார்வக் குழுக்கள் என பல்வேறு அமைப்புகள் இப்பிரச்னைகளில் பெரும்பாலானவற்றை தனித்தனியே அணுகி வந்திருந்தாலும் இவ்வமைப்புகளுக்கும், மக்களுக்குமிடையே முழுமையான தொடர்பு இருக்கவில்லை. இந்தத் தொடர்பறுந்த நிலையானது நம் சமூகத்தின் அடிப்படையில் உள்ள பின்வரும் இரண்டு இடைவெளிகளின் பிரதிபலிப்பேயாகும்: (அ) வசதிகள் வாய்க்கப் பெற்ற பிரிவினருக்கோ விளிம்புநிலை மனிதர்களின் பிரச்னைகளைப் பற்றிய முழுமையான அறிவில்லை. (ஆ) விளிம்புநிலை மனிதர்களுக்கோ தங்களுடைய பிரச்னைகளின் அடிப்படைக் காரணங்களைப் புரிந்து கொள்ளக் கூடிய கல்வியறிவோ, விழிப்புணர்வோ அல்லது இரண்டுமே இருக்கவில்லை. அப்படியே புரிந்து கொண்டாலும், அப்பிரச்னைகளைக் களைவதற்கான வழிகளை அறிய வாய்ப்பில்லை. டி.எம்.ஐ நிறுவனம் இந்த இடைவெளிகளை நிரப்பும் பாலமாகச் செயல்பட விரும்புகிறது. விளிம்புநிலை மனிதர்கள் கூட தங்கள் குரலை சுதந்திரமாகவும், அதே நேரம் தனிமனித தாக்குதல்களின்றியும் ஒலிக்கும் வண்ணம் இணைய வசதிகளைப் பயன்படுத்தி ஒரு தளத்தை உருவாக்க விரும்புகிறது.

டி.எம்.ஐ. நிறுவனம் தமிழ்மணத்தை ஏற்கும்போது ஏறத்தாழ நானூறு பதிவுகளே இருந்தன; ஆனால், இன்றோ தமிழ்மணத்தில் இணைந்த பதிவுகளின் எண்ணிக்கை பத்தாயிரத்தைத் தொடவிருக்கிறது. பத்தாயிரம் பதிவுகளை தினமும் தானியங்கியாக தமிழ்மணம் திரட்டுகிறது. பதிவுகளை மட்டுமில்லாமல் அந்தப் பதிவுகளின் மறுமொழிகள், குறிச்சொற்கள், குறிச்சொற்களைக் கொண்டு தானியங்கியாக பதிவுகளை நகைச்சுவை, தொழில்நுட்பம் என பலப் பரிவுகளாக வகைப்படுத்தும் சேவை, பதிவுகள் வாசகர்களிடம் பெற்றுள்ள பரப்பினை தெரிவிக்கும் “தமிழின் முன்னணி பதிவுகள்”, ஒவ்வொரு ஆண்டும் அந்த ஆண்டில் பிரபலமாக உள்ள பதிவுகள் என பல்வேறு தொழில்நுட்ப வசதிகளை தமிழ் வலைப்பதிவுகளைச் சார்ந்து தமிழ்மனம் வழங்கி வருகிறது. தமிழில் மட்டுமில்லாமல் பிற தெற்காசிய பிராந்திய மொழிகளில் கூட இல்லாத பல சேவைகளை தமிழ்மணம் வழங்க தமிழ் மீடியா இண்டர்நேசனல் நிறுவனம் உழைத்துள்ளது.

தொழில்நுட்பம் தவிர, டி.எம்.ஐ. நிறுவனத்தின் மற்றொரு முயற்சியான பூங்கா வலையிதழைக் குறிப்பிட வேண்டும். தமிழ்மணத்தில் திரட்டப்படும் வலைப்பதிவுகளில் இருந்து புதிய பார்வைகளையும் பரந்துபட்ட சிந்தனைகளையும் உயிர்ப்பான மொழியிலே வெளிப்படுத்தும் படைப்புகளை அனுமதி பெற்றுத் தேர்ந்தெடுத்து வாரந்தோறும் தொகுப்பது பயனானதெனக் கருதி, “பூங்கா” வலையிதழைத் தமிழ்மணம் செப்டம்பர் 2006 இலே ஆரம்பித்தது. இக்கவனிப்பினூடாக தமிழ்ப்பதிவர்களின் பல்வேறு துறை நிபுணத்துவத்தை அடையாளங் கண்டு பதிவு செய்யத்தூண்டவும் மொழிவெளிப்பாட்டின் பல்வேறு கலைப்பரிமாணங்களைப் பரிசோதனை செய்ய ஊக்குவிக்கவும் சமூக அக்கறையுள்ளவர்களை ஒன்றிணைக்கவும் வேண்டிய தொடர்ச்சியான தேவையை நிறைவேற்றலாமென டி.எம்.ஐ. திடமாக நம்பியது; இன்னமும் நம்புகிறது. ஆனால், கிட்டத்தட்ட ஓராண்டு காலம் வெளிவந்த பூங்கா, தமிழ்மணம் போலத் தானியங்காமல் தனித்து ஓர் ஆசிரியர்குழுவின் கீழே இயங்க வேண்டியிருந்ததால் எங்கள் குழுவினரின் நேரத்தை அதிகம் எடுத்துக் கொள்ள நிறுத்தப்படவேண்டியதாயிற்று. இருப்பினும் இன்றும் பல பதிவர்கள் அம்முயற்சியை நினைத்துப்பார்க்கும்படியாக அமைந்தது பூங்கா என்பதில் மாறுபட்ட கருத்திருக்க முடியாது.
அடுத்து, ஜனவரி 2008 ஆம் ஆண்டு புதிய தமிழ்மணம் 2.0 சிறப்பான முறையில் வெளியிடப்பட்டது. தொடக்கத்தில் புதிய தமிழ்மணத்தின் இடைமுகம் பரிச்சயமின்மையால் முழு வரவேற்பைப் பெறாவிடினும், பழக ஆரம்பித்த சில நாட்களிலேயே அதனுடைய தொழில்நுட்ப மேம்பாட்டினால் பதிவர்களின் ஆதரவைப் பெற ஆரம்பித்தது. புதிய தமிழ்மணம் அளித்த தொழில்நுட்ப வசதிகள் ஏராளம். மறுமொழி திரட்டி, குறிச்சொல் திரட்டி, வாசகர் பரிந்துரை, சூடான இடுகைகள், தனித்தனியேயான துறைசார் பதிவுப்பக்கங்கள், பதிவர்களின் படங்கள் திரட்டல் என பல சேவைகளைக் குறிப்பிட விரும்புகிறோம்.

தமிழ்மணத்தின் இன்னொரு மைல் கல் திரைமணம். திரைப்படங்களை அடிப்படையாகக் கொண்டு எழுதப்பட்ட பதிவுகள் வாசகர்களின் மத்தியில் அதிக கவனத்தைப் பெறுதலால், புதிய திரைப்படங்கள் வெளிவரும் வேளைகளில் எல்லாம் புதிய சவாலையும் ஏற்படுத்தியது. திரைப்படப் பதிவுகள் அதிகம் வரும் பொழுது மற்ற பதிவுகள் தமிழ்மணம் முகப்பில் அதிக நேரம் நிற்காமையால் பிற துறைகளில் நன்றாக எழுதும் பதிவர்களுக்கு ஏமாற்றத்தை அளித்தது. மேலும் திரைப்படங்களைப் பற்றி படிக்க விரும்பும் வாசகர்களுக்கும் புதிய வசதிகளை ஏற்படுத்திக் கொடுக்க நினைத்தோம். அதில் உருவாகியதுதான் திரைமணம். இன்று திரைமணம் பதிவர்களிடையேயும் வாசகர்களிடையேயும் பெரிதும் வரவேற்பைப் பெற்றிருக்கிறது.

இறுதியாக, தமிழ்மணம் விருதுகளைக் குறிப்பிட விரும்புகிறோம். பொதுவாகவே வலைப்பதிவு விருதுகள் வழங்குவதில் உள்ள சவால்களையும், குளறுபடிகளையும் எதிர்கொள்ளமுடியாமல் பிறமொழிகளிலெல்லாம் விருதுகள் நிறுத்தப் பட்டிருக்கின்றன. ஆனால், தமிழ்மணம் விருதுகள் செயற்பாடு பல்வழிகளில் ஆராயப்பட்டு தனிநபர் தலையீடு மற்றும் குறைபாடுகள் ஏதுமில்லாமல் கடந்த மூன்றாண்டுகளாக வெற்றிகரமாக செயல்பட்டு வருகிறது. ஒவ்வோர் ஆண்டும் சுட்டிக்காட்டப்படும் சிறுகுறைகளைக்கூட பின்வரும் ஆண்டிலே பதிவர்களுடைய உதவியுடன் நீக்குகிறோம்.

இருப்பினும், இவையனைத்தையும் விட தமிழ்மணத்தின் வெற்றி வலைப்பதிவர்களாகிய உங்களது தொடர்ந்த ஆதரவில்தான் இருக்கிறது. சில நேரங்களில் எங்களுடைய சேவையில் தொய்வு ஏற்படும்போதுகூட குறைகளைச் சுட்டிக்காட்டி தொடர்ந்து எங்களுக்கு பக்கபலமாக இருந்திருக்கிறீர்கள். அண்மையில் எங்களுக்கு ஏற்பட்ட பொருளாதார நெருக்கடியைத் தீர்க்கவும் நன்கொடை அளித்தீர்கள். அவை அனைத்திற்குமான எமது நன்றியை இந்நேரத்தில் தெரிவித்துகொள்வதோடு தொடர்ந்து உங்கள் புரிதலையும் ஆதரவையும் வேண்டுகிறது.

தமிழ் மீடியா இண்டர்நேசனல் நிறுவனம்
(Tamil Media International Inc)

தமிழ்மணத்திற்கு நன்கொடை

தமிழ்மணம் செயல்பட்டு வந்த வழங்கியில் ஏற்பட்ட கோளாறு காரணமாக தமிழ்மணம் இணைய தளத்தின் தறவிறக்கம் கடந்த சில வாரங்களாக, மிகவும் தாமதமாக இருந்து வந்தது. இந்தப் பிரச்சனையை தற்பொழுது சரி செய்திருக்கிறோம். இன்னும் சில பணிகள் தற்பொழுது நடைபெற்று வருகிறது. இன்னும் ஒரு வாரத்தில் இது முழுமையடையும் என்று நம்புகிறோம். தமிழ்மணத்தின் தற்போதைய பிரச்சனைகள் களையப்பட்டு மீண்டும் ஒரு சிறப்பான சேவையை அளிக்க முடியும் என உறுதியளிக்கிறோம். அது வரை தற்போதைய சிரமங்களுக்கு பொறுத்தருள பதிவர்கள், வாசகர்களிடம் வேண்டுகிறோம்

வழங்கிச் செலவுகள் அதிகரித்து வரும் சூழலில், விளம்பரங்கள் மட்டுமே தமிழ்மணத்தின் வழங்கிச் செலவுகளை ஈடுசெய்யக்கூடியதாக இல்லை. இதன் காரணமாக, கடந்த ஏழு ஆண்டுகளாக செயல்பட்டு வரும் தமிழ்மணம், முதன்முறையாக நன்கொடையை எதிர்நோக்குகிறது.தமிழ்மணம் தமிழின் முதன்மையான வலைத்திரட்டி ஆகும். வேறு எந்த இந்திய மொழிகளிலும் இல்லாத வகையில் வலைப்பதிவுகள் சார்ந்த பல்வேறு தொழில்நுட்ப வசதிகளை உள்ளடக்கிய தளமாக தமிழ்மணம் கடந்த 7 ஆண்டுகளாக செயல்பட்டு வருகிறது. தமிழ்மணத்தை லாப நோக்கு இல்லாத நிறுவனமாக செயல்பட்டு வரும் தமிழ் மீடியா இண்டர்நேஷனல் நிறுவனம் நடத்தி வருகிறது.

தொடர்ச்சியாக வளர்ந்து வரும் தமிழ் வலைப்பதிவுகளுக்கு தடையில்லாத தரமான சேவையை வழங்க நன்கொடைகளை எதிர்பார்க்கிறோம். நன்கொடைகளை பேபால் மூலமாக செலுத்தும் வசதியினை ஏற்படுத்தியிருக்கிறோம்

நன்கொடை அளிக்க இந்தப் பக்கத்திற்கு செல்லுங்கள் – http://www.tamilmanam.net/tamilmanam_donate.php

புரிந்துணர்வுடன் தொடரும் ஒத்துழைப்பிற்கு நன்றி…

நிர்வாகம்
தமிழ்மணம்

தமிழ்மணம் விருகள் 2010 – பரிசு கூப்பன்

தமிழ்மணம் விருதுகள் 2010 நிகழ்வில் வெற்றி பெற்றவர்களுக்கு பரிசுக் கூப்பனை மின்னஞ்சலில் அனுப்பி இருக்கிறோம். இதனைக் கொண்டு சென்னை நியூ புக்லாண்ட்ஸ் புத்தகக் கடையிலும், நூல் உலகம் இணையத்தளத்திலும் (http://www.noolulagam.com/) புத்தகங்கள் பெற்றுக் கொள்ளலாம்.

நியூ புக்லாண்ட்ஸ் புத்தகக் கடைக்கு செல்லும் பொழுது மின்னஞ்சலை அச்சு எடுத்து செல்லுமாறு கேட்டுக் கொள்கிறோம். வெளியூரில் இருந்தால் நியூ புக்லாண்ட்ஸ் புத்தகக் கடையை தொடர்பு கொண்டு அஞ்சல் மூலமாக புத்தகங்களை பெற்றுக் கொள்ளலாம்.

புரிந்துணர்வுடன் தொடரும் உங்களின் ஒத்துழைப்பிற்கு நன்றி…

நிர்வாகம்,
தமிழ்மணம்

புத்தாண்டு வாழ்த்துக்கள்; புதிய சேவை

தமிழ்மணத்தின் பதிவர்கள், வாசகர்கள் அனைவருக்கும் எங்களது இனிய ஆங்கில புத்தாண்டு நல்வாழ்த்துக்களை தெரிவித்துக் கொள்கிறோம்.

இந்தப் புத்தாண்டில் தமிழ்மணம் மற்றொரு புதிய சேவையை அறிமுகப்படுத்துகிறது. ஏற்கனவே ”தமிழின் முன்னணி வலைப்பதிவுகள்” என்ற சேவையின் மூலம் ஒவ்வொரு வாரமும் முதல் 20 இடங்களைப் பெற்ற வலைப்பதிவுகளின் பட்டியலை வெளியிட்டு வந்தோம்.

இதன் தொடர்ச்சியாக கடந்த மூன்று மாதங்களில் ஒவ்வொரு பதிவும் பெறும் பார்வைகளை முதன்மையாகக் கொண்டு தமிழ்மணத்தில் இணைந்துள்ள ஒவ்வொரு பதிவையும் தர வரிசை படுத்தும் புதிய சேவையை – தமிழ்மணம் தரவரிசை(Traffic Rank) அறிமுகப்படுத்துகிறோம். இந்தச் சேவை தமிழ்மணத்தில் இணைந்துள்ள அனைத்து பதிவுகளுக்கும் அளிக்கப்படும். தற்பொழுது தமிழ்மணத்தில் இருந்து பெறும் பார்வைகளை அடிப்படையாக கொண்டு இந்த சேவை செயல்பட்டாலும் எதிர்காலத்தில் ஒரு தளம் பெறும் மொத்த பார்வைகளையும் கொண்டு செயல்படும் வகையில் இந்தச் சேவை விரிவு படுத்தப்படும்.

இந்தச் சேவையை எப்படி பயன்படுத்துவது ?

இதற்கென ஒரு பக்கம் உருவாக்கப்பட்டுள்ளது http://www.tamilmanam.net/blog_ranking.php. அங்கே சென்று உங்கள் தளத்தின் முகவரியை அளித்தால் அந்தப் பதிவின் தரவரிசை(Traffic Rank) கிடைக்கும்.

உதாரணமாக தமிழ்மணம் அறிவிப்புகள் தளத்தின் தர வரிசை 112

Tamilmanam Tamil blogs Traffic Rank

இதனைப் பெற தளத்தின் முகவரியை அளிக்க வேண்டும்

அளி என்ற பொத்தானை அழுத்தியவுடன் தளத்தின் தரவரிசை கிடைக்கும். அத்துடன் உங்கள் தளத்தில் இந்த தரவரிசையை வைத்துக் கொள்வதற்கான நிரலும் இருக்கும். இந்த நிரலை உங்கள் வலைத்தளத்தில் வைத்துக் கொள்வதன் மூலம் தரவரிசை புதுப்பிக்கப்படும் பொழுது உங்கள் தளத்தில் இருந்தே புதிய தரவரிசையை தெரிந்து கொள்ளலாம்

இந்தச் சேவை பதிவர்களுக்கும், வாசகர்களுக்கும் ஒரு இனிய வலைப்பதிவு அனுபவத்தை அளிக்கும் என நம்புகிறோம்.

*************

2010ம் ஆண்டுக்கான முதல் 100 இடங்களைப் பெற்ற பதிவுகளின் தரவரிசை நாளை, புத்தாண்டு தினத்தன்று வெளியாகும்

புரிந்துணர்வுடன் தொடரும் ஒத்துழைப்பிற்கு நன்றி…

நிர்வாகம்,
தமிழ்மணம்

தமிழ்மணம் விருதுகள் 2010 முதல் சுற்று முடிவுகள்

தமிழ்மணம் விருதுகள் 2010ம் ஆண்டு நிகழ்வில் பதிவர்கள் மட்டும் பங்கெடுக்கும் முதல் சுற்று வாக்கெடுப்பு நேற்றுடன் நிறைவு பெற்றது. முதல் சுற்றில் அதிக ஓட்டுகளைப் பெறும் 10 இடுகைகள் அடுத்தச் சுற்றுக்கு தகுதி பெறும் என அறிவித்து இருந்தோம். ஆனால் பல இடுகைகள் ஒரே அளவிலான வாக்குகளைப் பெற்று இருப்பதால், ஒவ்வொரு பிரிவில் இருந்தும் 10க்கும் மேற்பட்ட இடுகைகள் அடுத்தச் சுற்றுக்கு தேர்வு செய்யப்பட்டுள்ளன‌.

தமிழ்மணம் விருதுகள் 2010 முதல் சுற்று முடிவுகள் – http://www.tamilmanam.net/awards2010/1st_round_results.php

போட்டியில் ஆர்வத்துடன் பங்கேற்று தங்கள் இடுகைகளை பரிந்துரை செய்ததுடன் மட்டுமில்லாமல் வாக்கெடுப்பிலும் பங்கேற்ற பதிவர்களுக்கு எங்கள் நன்றியை தெரிவித்துக் கொள்கிறோம்.

அடுத்தச் சுற்று பொது வாக்கெடுப்பு நாளை டிசம்பர் 28 முதல் தொடங்குகிறது. பதிவர்கள், வாசகர்கள் என அனைவரும் இதில் பங்கு பெறலாம். சனவரி 4ம் தேதி வரை வாக்கெடுப்பு நடைபெறும். தமிழ்மணத்தில் பயனர் கணக்கை வைத்துள்ள அனைவரும் இந்த வாக்கெடுப்பில் பங்கு பெற முடியும்.

வாக்குச்சீட்டு

வாக்குச்சீட்டு இந்தச் சுட்டியில் உள்ளது.
http://www.tamilmanam.net/login/tmawards_2010_vote.php
உங்கள் பயனர் பெயரை கொண்டு உள்நுழைந்து இரண்டாம் சுற்றில் வாக்களிக்க முடியும்..

நிர்வாகம்,
தமிழ்மணம்

2010ம் ஆண்டின் முன்னணி வலைப்பதிவுகள்

தமிழ்மணம் ஒவ்வொரு வாரமும் தமிழின் முன்னணி வலைப்பதிவுகள் என்ற சேவையை வழங்கி வருகிறது. இதன் தொடர்ச்சியாக இந்தச் சேவையை 2010ம் ஆண்டு முழுமைக்கும் வெளியிட தமிழ்மணம் முடிவு செய்துள்ளது. 2010ம் ஆண்டின் முன்னணி வலைப்பதிவுகளின் பட்டியல் வரும் சனவரி 1ம் தேதி வெளியிடப்படும். வாசகர்களிடம் அதிக வரவேற்பினை பெற்றுள்ள முதல் 100 வலைப்பதிவுகள் இந்தப் பட்டியலில் இடம் பெறும்.

நிர்வாகம்,
தமிழ்மணம்

தமிழ்மணம் விருதுகள் 2010 – ”நூல் உலகம்” வழங்கும் புத்தகங்கள்

தமிழ்மணம் விருதுகள் 2010ம் ஆண்டின் விளம்பரதாரராக அமெரிக்காவைச் சேர்ந்த அலோகா நிறுவனத்துடன் மற்றொரு விளம்பரதாரராக “நூல் உலகம்” (http://www.noolulagam.com/) இணையத்தளமும் இணைகிறது என்பதை மகிழ்ச்சியுடன் தெரிவித்துக் கொள்கிறோம். “நூல் உலகம்” இணையத்தளத்தை நடத்தும் “ஜீவா புத்தகாலயம்“, தமிழகத்தில் நாமக்கல் நகரை தலைமை இடமாக கொண்டு செயல்படுகிறது.

தமிழ்மணம் ஏற்கனவே முதல் பரிசாக ரூ1000.00, இரண்டாம் பரிசாக ரூ500.00 மதிப்புள்ள புத்தகங்களை நியூபுக்லேன்ட்சு மூலமாக வழங்குகிறது. இதைத் தவிர கீழ்கண்ட புத்தகங்களை தமிழ்மணமும், நியூபுக்லேன்ட்சு நிறுவனமும் வழங்குகின்றன.

1. மெல்லச் சுழலுது காலம் – இரா. செல்வராசு (தமிழ்மணம் சார்பாக)
2. யுத்தங்களுக்கிடையில் – அசோகமித்ரன் (நியூபுக்லேன்ட்சு சார்பாக)

கூடுதலாக கீழ்கண்ட பரிசுகளை நூல் உலகம் இணையத்தளம் வழங்குகிறது.

முதல் பரிசு ரூ500.00 மதிப்புள்ள புத்தகங்கள்
இரண்டாம் பரிசு ரூ250.00 மதிப்புள்ள புத்தகங்கள்
noolulagam

நூல் உலகம் வழங்கும் பரிசுக் கூப்பனைக் கொண்டு நீங்கள் விரும்பும் புத்தகங்களை நூல் உலகம் இணையத்தளத்தின் மூலமாக பெற்றுக் கொள்ளலாம்.

நூல் உலகம் வழங்கும் பரிசுத்தொகையையும் சேர்த்து மொத்தம் ரூ45,000.00 மதிப்புள்ள பரிசுகளை தமிழ்மணம் விருதுகள் 2010 விருதுகள் மூலம் வழங்குகிறோம் என்பதை தெரிவித்துக் கொள்கிறோம்.

புரிந்துணர்வுடன் தொடரும் ஒத்துழைப்பிற்கு நன்றி…

நிர்வாகம்,
தமிழ் மீடியா இண்டர்நேசனல்

தமிழ்மணத்தின் பரிசுத் தொகை குறித்த விளக்கம்

தமிழ்மணத்தின் பரிசுத்தொகை குறித்த சில கேள்விகளைப் பதிவர்கள் சிலர் மறுமொழிகளிலும் மின்னஞ்சல் மூலமாகவும் எழுப்பி உள்ளனர். தமிழ்மணம் வழங்கும் பரிசுத்தொகை மிகவும் குறைவான தொகையாக உள்ளதான ஒரு கருத்து இந்த மறுமொழிகளிலும் கேள்விகளிலும் முன்வைக்கப்பட்டுள்ளது. தமிழ்மணத்தை நடத்தும் தமிழ் மீடியா இண்டர்நேசனல் நிறுவனம் ஒரு வணிக நோக்கற்ற தன்னார்வ நிறுவனமாகவே செயற்பட்டு வருகிறது. கடந்த இரு மாதங்களாக பெற்றுக் கொள்ளத் தொடங்கி இருக்கும் விளம்பரங்களைத் தவிர்த்து கடந்த நான்கு ஆண்டுகளுக்கும் மேலாக தமிழ்மணத்தை நடத்தி வரும் தமிழ் மீடியா இண்டர்நேசனல் நிறுவனம் எந்த வருமானத்தையும் ஈட்டவில்லை. வணிக நோக்கிலும் நாங்கள் செயல்பட வில்லை என்பதை தெரிவித்துக் கொள்கிறோம்.

அதே நேரத்தில் தமிழ்மணம் போன்ற அதிக பயனர்களைக் கொண்ட திரட்டியை நடத்த பல இலட்சக்கணக்கான ரூபாய்களை நாங்கள் செலவழித்திருக்கிறோம் என்பதையும் தெரிவிக்க விரும்புகிறோம். புலம்பெயர்ந்து வெளிநாட்டில் வாழும் நண்பர்களின் தமிழ் மொழி ஆர்வத்தினாலும், தனிப்பட்ட உழைப்பினாலும்மட்டுமே இது சாத்தியமாகியுள்ளது என்பதை அனைவரும் புரிந்து கொள்ள இயலும் என நம்புகிறோம். ஆனால், நண்பர்கள் சிலரின் கூட்டுமுயற்சியால் மட்டுமே பல்லாண்டுகளாக ஒரு தளத்தினையும் நிறுவனத்தையும் நடத்துவது சாத்தியமானதல்ல. காரணம் இணையத்தளத்தினைத் தொடர்ந்து நடத்துவதற்கு பொருளாதார பலமும் தேவை. தமிழ்மணத்தினை ஓராண்டு நடத்தவே பல ஆயிரம் ரூபாய்கள் தேவைப்படுகின்றன. இத்தேவைக்காகத்தான் தமிழ்மணம் விளம்பரங்களைப் பெற்றுக் கொள்ளத் தொடங்கியிருக்கிறது.

இவ்வாறான சூழலில் வலைப்பதிவர்களைத் தொடர்ந்து ஊக்குவிக்க வேண்டும் என்ற அடிப்படை நோக்கில் மட்டுமே ‘தமிழ்மணம் வலைப்பதிவு விருது’ ஏற்படுத்தப்பட்டுள்ளது. அந்த அடிப்படை நோக்கத்திற்கு ஓர் அடையாளமாகவே பரிசுகளும் பரிசுத் தொகையும் நிர்ணயிக்கப்பட்டுள்ளன. இந்த ஆண்டின் மொத்த பரிசுத்தொகை சுமார் 30,000 ரூபாய். எந்த லாபமும் இல்லாமல் செயற்படும் ஒரு நிறுவனத்திற்கு இஃது ஒரு மிகப் பெரிய தொகையே. ஒரு பிரிவிற்கு ரூ1000.00, ரூ500.00 என மிகவும் குறைந்த பரிசாகத் தெரிந்தாலும் தமிழ்மணத்தின் நிதி ஆதாரத்தை பொறுத்தவரையில் மொத்த பரிசுத்தொகையான சுமார் 30,000 ரூபாய் ஒரு குறிப்பிடத்தகுந்த தொகையே ஆகும்.

இந்த ஆண்டு தமிழ்மணம் சில விளம்பரதாரர்களைப் பெற்றிருக்கிறது. அடுத்த வரும் ஆண்டுகளிலும் விளம்பரதாரர்கள் மூலமாக பரிசுகளை வழங்க தமிழ்மணம் முடிவு செய்துள்ளது. இதைத் தவிரவும் தமிழ்மணம் விளம்பரங்கள் மூலம் ஈட்டப்படும் தொகையை தமிழ்மணம் வழங்கிச் செலவுகள் தவிர தமிழ்மணம் விருதுகள் மற்றும் பிற வலைப்பதிவு சேவைகளுக்குப் பயன்படுத்தவே தமிழ் மீடியா இண்டர்நேசனல் நிறுவனம் விரும்புகிறது.

தமிழ் மீடியா இண்டர்நேசனல் நிறுவனம், வணிக மயமான ஊடக வெளியில் இருந்து விலகிச் சாதாரண மக்களின் குரலை ஊடகவெளியில் ஒலிக்கச் செய்யும் பணியைச் செய்வதையே அடிப்படை நோக்கமாக கொண்டுள்ளது. ஒடுக்கப்பட்ட மக்களின் குரலை ஒலிக்கச் செய்வதில் இணையம் தற்பொழுது முக்கிய பங்காற்றி வருகிறது. இந்த இணைய வெளியில் ஒடுக்கப்பட்ட மக்களின் குரலை ஒலிக்கும் ஒரு தளமாகவே தமிழ்மணம் செயல்பட தமிழ் மீடியா இண்டர்நேசனல் நிறுவனம் முயன்று வருகிறது. இந்த முயற்சியில் இது வரை எங்களுக்கு அளித்து வரும் ஆதரவையும் ஒத்துழைப்பையும் தொடர்ந்து வலைப்பதிவர்கள் மற்றும் வாசகர்களிடமிருந்து எதிர்பார்க்கிறோம்

புரிந்துணர்வுடன் தொடரும் ஒத்துழைப்பிற்கு நன்றி…

நிர்வாகம்,
தமிழ் மீடியா இண்டர்நேசனல்

« Previous PageNext Page »