தமிழ்மணம் அறிவிப்புகள்

“மார்பகப் புற்றுநோயைத் துவக்கத்திலேயே கண்டறிதல்” கையேடு

January 27, 2007 – 9:32 am by தமிழ்மணம்

தமிழ் மீடியா இன்டர்நேஷனல் நிறுவனம், உலகளாவிய தமிழர்களிடையே உடல்நலம்/சுகாதாரம் குறித்த விழிப்புணர்வைப் பரவலாக்கும் வகையில் கையேடுகளைத் தயாரித்து வருகிறது. இதன் முதற்கட்டமாக “மார்பகப் புற்றுநோயைத் துவக்கத்திலேயே கண்டறிதல்” என்ற கையேடு இன்று வெளியிடப்படுகிறது. இது இரண்டு விதமான பயனாளர்களுக்காக உருவாக்கப்பட்டிருக்கிறது:

1. தனிநபர்கள் தரவிறக்கிப் படித்துக் கொள்ளலாம்
2. தொண்டு நிறுவனங்களில் பணியாற்றும் தன்னார்வலர்கள்/பணியாளர்கள், இக்கையேட்டினைத் தாங்கள் சார்ந்திருக்கும் நிறுவனத்தின் வாயிலாகப் பொதுமக்களிடையே பரப்ப விரும்பினால், அதற்கான கையேடுகளை டி.எம்.ஐ அச்சிட்டுத் தருவதைப் பரிசீலிக்கும். விருப்பமுள்ள தன்னார்வலர்கள் கான்டாக்ட் அட் டிஎம்ஐ-எல்எல்சி டாட் காம் என்ற மின்னஞ்சலில் எம்மோடு தொடர்பு கொள்ளவும்.
———————————

“மார்பகப் புற்றுநோயைத் துவக்கத்திலேயே கண்டறிதல்” கையேட்டினைப் பற்றி:

வளர்ந்த நாடுகளிலும், வளர்ந்து வரும் நாடுகளிலும் மார்பகப் புற்றுநோய் ஒரு கொடிய நோயாக உருவெடுத்துள்ளது. அமெரிக்காவில் மட்டும் எட்டுப்
பெண்களுள் ஒருவர் தன் வாழ்நாளில் மார்பகப் புற்றுநோயால் பீடிக்கப்படுவதாகவும், ஒவ்வொரு வருடமும் ஏறத்தாழ 2,00,000 பெண்கள் இந்நோயால் பாதிக்கப்படுவதாகவும், ஒவ்வொரு வருடமும் 40,000 பெண்கள் இந்நோயால் இறப்பதாகவும் கணக்கிடப்பட்டிருக்கிறது. இந்நிலையில் மார்பகப்
புற்றுநோயை இந்நோயின் ஆரம்பநிலையிலேயே கண்டறிவது நோயைத் தடுக்கப் பெரிதும் உதவுகிறது. இதனைக் கருத்திற்கொண்டு தமிழ் மீடியா இன்டர்நேஷனல்
ஒரு கையேட்டினை வெளியிடுகிறது.

“மார்பகப் புற்றுநோயைத் துவக்கத்திலேயே கண்டறிதல்” என்ற இக்கையேடு, ஆசிய, இந்திய மகளிர் விழிப்புணர்வுக்கென உருவாக்கப்பட்டது. இதில், மார்பகப் புற்றுநோய் என்றால் என்ன, அதன் அறிகுறிகள் யாவை, இந் நோயை ஆரம்ப கட்டத்திலேயே கண்டறிவதன் முக்கியதுவம் என்ன, மார்பகத்தில் ஏற்படும் மாற்றங்களைத் தெரிந்து கொள்வது அல்லது உணர்ந்து கொள்வது எப்படி, எங்கு, எப்போது மார்பக ஆய்வு (mammogram) என்னும் பரிசோதனையைச் செய்து கொள்வது, போன்ற பெண்களுக்கு மிகப் பயனுடைய பல தகவல்களை உள்ளடக்கி உருவாக்கப்பட்டது.

மார்பகப் புற்றுநோய் பற்றிய அடிப்படைத் தகவல்கள் மற்றும் அந்நோயின் அறிகுறிகளை விரிவாகத் தருவதே இக்கையேட்டின் நோக்கம். இக் கையேட்டில் உள்ள சில அடிப்படை தகவல்கள் “மார்பக ஆய்வைப் பரப்புரை செய்யுங்கள்” (”Spread the Word on Mammogram”) என்ற அமெரிக்காவின் தேசிய புற்றுநோய்க் கழகம் (National Cancer Institute) வெளியிட்டுள்ள பயிற்சி ஏட்டின் மூலமும், வலைத்தளங்களில் நாங்கள் மேற்கொண்ட ஆய்வுகளிலிருந்தும், படங்கள் வலைத்தளங்களில் இருந்தும் மற்றும் ஆசிய, இந்திய பத்திரிக்கைகளில் இருந்தும் திரட்டப் பட்டன. இக்கையேட்டில் இடம்பெற்றிருக்கும் விபரங்களையும், கேள்வி-பதில்களையும், இந்திய-ஆசிய மகளிரிடம் முற்சோதனை செய்திருக்கிறோம். இக் கையேட்டின் ஆங்கில மூலத்தின் நேரடி மொழி பெயர்ப்பாக இத் தமிழ்க் கையேடு உருப்பெற்றிருக்கிறது. சில தமிழ் வலைத்தளங்களில் இருந்து தமிழ் எழுத்துருக்களைத் தரவிறக்கிப் பயன்படுத்தியிருக்கிறோம். வாசக நண்பர்கள் அனைவரும் இக்கையேட்டினைப் படித்துப் பயனடைய வேண்டுகிறோம்.

அன்புடன்,
டி.எம்.ஐ. நிர்வாகம்