தமிழ்மணம் வலைப்பதிவு விருதுகள் – 2011

இவ்வாண்டின் மிகச்சிறந்த இடுகைகளை தெரிவு செய்யும் பதிவுத் திருவிழா

தமிழின் முண்ணனித் திரட்டியாக விளங்கும் தமிழ்மணம் ஆண்டுதோறும் வலைப்பதிவில் வெளிவரும் சிறந்த இடுகைகளை தேர்வு செய்து விருதுகள் வழங்கி வருகிறது. இந்த ஆண்டும், 2011ம் ஆண்டில் வெளிவந்த படைப்புகளுக்கான விருதுகளை வழங்கும், “தமிழ்மணம் வலைப்பதிவு விருதுகள் – 2011” நிகழ்வு வரும் டிசம்பர் மாதம் தொடங்கி பொங்கல் தினம் வரை நடைபெறும் என்பதை மகிழ்ச்சியுடன் தெரிவித்துக் கொள்கிறோம்.

கடந்த ஆண்டு போலவே இந்த ஆண்டும் விருதுகள் நிகழ்வு 20 பிரிவுகளில் நடைபெறும். கடந்த ஆண்டு போலவே இந்த ஆண்டும் பெண் பதிவர்கள் மட்டுமே பங்கு பெறும் பெண் பதிவர்களுக்கான ஒரு தனிப் பிரிவு ஏற்படுத்தப்பட்டுள்ளது. வலைப்பதிவுகளில் பெண் பதிவர்களின் பங்களிப்பை ஊக்குவிக்கும் பொருட்டே இந்தப் பிரிவு ஏற்படுத்தப்பட்டுள்ளது. கடந்த ஆண்டு பதிவர்கள் வழங்கிய ஆலோசனைகளை கருத்தில் கொண்டு பெண் பதிவர்கள் 3 பொதுப் பிரிவுகளிலும், பெண் பதிவர்களுக்கான தனிப் பிரிவிலும் போட்டியிடும் வகையில் விதிமுறையில் மாற்றங்களை செய்திருக்கிறோம் (விரிவான விதிமுறைகள் கீழே வழங்கப்பட்டுள்ளது)

திரைப்படங்களைச் சார்ந்த இடுகைகளுக்கு ”திரைமணம் விருதுகள்” என்ற பெயரில் திரைமணம் தளம் மூலம் விருதுகள் வழங்கப்படும்.

தமிழ்மணம் விருதுகள் நிகழ்வு, பதிவர் வாக்கெடுப்பு, வாசகர் வாக்கெடுப்பு, நடுவர் குழு பரிசீலனை என மூன்று கட்டங்களாக நடைபெறும்.

விருதுகள் தேர்வு முறை

ஒவ்வொரு பதிவரும் தன்னுடைய பதிவே சிறந்தது எனப் பெருமிதம் கொள்ளும் உரிமையைப் பெற்றிருந்தாலும், இடுகைகளுக்கு உடனுக்குடன் கிடைக்கும் சக பதிவர்கள்/வாசகர்களின் பின்னூட்டங்கள் மூலமான அங்கீகாரமும் பதிவர்களை மேலும் ஊக்குவிக்கும் சக்தியாகத் திகழ்கிறது. அப்படிப்பட்ட இடுகைகளை வாசகர்கள் மீண்டுமொருமுறை திரும்பிப் பார்க்க வைத்து அங்கீகரிப்பதே இந்த விருதுத் தேர்வுக்கான அடிப்படை. அறிவிக்கப்பட்ட போட்டிகளுக்காக எழுதப்படும் படைப்புகளாக அல்லாமல், தன்னெழுச்சியாக வெளிப்பட்ட படைப்புகளே இந்தத் தேர்வுகளுக்கு கணக்கிலெடுக்கப்படுவதால் இதில் போட்டியோ, ஏமாற்றமோ ஏற்படுவதற்கான வாய்ப்புகள் குறைவாக இருக்குமென்றே நம்புகிறோம்.

இவ்வாண்டின் தேர்வுகள் கீழ்காணும் பிரிவுகளில் இருக்கும்:
1. படைப்பிலக்கியம் (கதை, கவிதை, போன்றவை)
2. காட்சிப் படைப்புகள் (ஓவியம், புகைப்படங்கள் போன்றவை)
3. நூல் விமர்சனம், அறிமுகம்
4. அறிவியல், விவசாயம், சுற்றுச்சூழல், மருத்துவம், தொழில்நுட்பக் கட்டுரைகள்
5. பயண அனுபவங்கள், ஊர்/வாழ்வு நினைவோடைகள்
6. செய்திகள்/நிகழ்வுகளின் அலசல்கள்
7. அரசியல், சமூக விமர்சனங்கள்
8. பெண்கள் பிரச்னைகள், திருநங்கைகள் வாழ்வியற் சிக்கல்கள்
9. தலித் மக்களின் பிரச்சனைகள், மனித உரிமை, நிறவெறி (Racism) தொடர்பான கட்டுரைகள்
10. ஈழ மக்களின் வாழ்வியல், மனித உரிமை, சமூக, பொருளாதாரச் சிக்கல்கள்
11. தமிழ் மொழி, கலாச்சாரம், வரலாறு, தொல்லியல்
12. நகைச்சுவை, கார்ட்டூன்
13. சுயதேடல், பகுத்தறிவு, ஆன்மீகம்
14. பொருளாதாரம், வணிகம் தொடர்பான கட்டுரைகள்
15. தமிழ்க்கணிமை, தமிழ் விக்கிப்பீடியா, தமிழ் இணையம் தொடர்பான கட்டுரைகள்
16. விளையாட்டு, உடல் ஆரோக்கியம், உடல்நலம் மற்றும் சமையல் தொடர்பான கட்டுரைகள்
17. பெண் பதிவர்கள் மட்டும் பங்கு பெறும் பிரிவு – எந்த இடுகைகளாகவும் இருக்கலாம்
18. தமிழிசை, நடனம், தமிழ் கிராமியக் கலைகள் தொடர்பான கட்டுரைகள்

இந்த 18 பிரிவுகள் தவிர சிறந்த சினிமா இடுகைகளுக்கான திரைமணம் விருதுகள் கீழ்க்காணும் பிரிவுகளில் வழங்கப்படும்.
19. திரைப்பட விமர்சனங்கள் – தமிழ் சினிமா விமர்சனங்கள்
20. உலக சினிமா விமர்சனங்கள், குறும்படங்கள், திரைப்படக்கலை, மாற்று சினிமா தொடர்பான படைப்புகள்

தேர்வு நடைமுறை:
1. தனிப்பட்ட இடுகை (post) அல்லது இடுகைத் தொடர்களே விருதுக்கு தேர்வு செய்யப்படும். வலைப்பதிவு முழுமைக்குமான விருது என்று எதுவும் இல்லை.

2. டிசம்பர் 1, 2010 முதல் நவம்பர் 30 2011 வரை எழுதப்பட்ட இடுகைகள் மட்டுமே விருதுகள் தேர்வுக்கு இடம்பெறும்

3. எந்தவொரு இடுகையையும் எழுதிய பதிவரே பரிந்துரை செய்யவேண்டும். ஒரே பதிவர் அதிகபட்சமாக மூன்று வெவ்வேறு பிரிவுகளுக்குப் பரிந்துரை செய்யலாம். ஆனால் ஒரு பிரிவுக்கு ஒரே ஒரு இடுகையை மட்டுமே பரிந்துரை செய்ய முடியும். மேலும் குறிப்பிட்ட இடுகையை ஒரு பிரிவுக்கு மட்டுமே பரிந்துரை செய்யலாம். பெண் பதிவர்கள் மூன்று பிரிவுகள் தவிர பெண் பதிவர்களுக்கான தனிப் பிரிவிலும் போட்டியிட முடியும்

4. உங்களது பரிந்துரைகளை அளிப்பதற்கென ஒரு சிறப்புத்தளம் ஏற்படுத்தப்பட்டுள்ளது. அதற்கான சிறப்புத் தொடுப்பும் வழிமுறைகளும் தமிழ்மணத்தில் பதியப்பட்டுள்ள பதிவர்களின் மின்னஞ்சல் முகவரிக்கு அனுப்பப்படும்.

5. பரிந்துரைக்கப்படும் படைப்புகள் 2011 ஆம் ஆண்டில் முதல் முறையாகப் எழுதப்பட்டிருக்கவேண்டும். பரிந்துரைகள் 2011 ஆண்டில் வெளியிடப்பட்ட முந்தைய ஆண்டுகளின் படைப்புகளின் மீள்பதிவுளாக இருத்தலாகாது.

6. தமிழ்மணம் விருதுத் தேர்வுகள் மூன்று கட்டமாக நடைபெறும்.

7. தமிழ்மணத்தின் முதற்கட்ட வாக்கெடுப்பு வலைப்பதிவர்களுக்கானது. தமிழ்மணத்தில் பதிவு செய்துள்ள வலைப்பதிவர்கள் அனைவரும் வாக்களிக்கலாம். ஒரு பதிவருக்கு ஒரு பிரிவுக்கு ஒரு வாக்கு என்னும் அடிப்படையில் வாக்குரிமை இருக்கும்.

8. இரண்டாம் கட்ட வாக்கெடுப்பு வாசகர்களுக்கானது. முதற்கட்ட வாக்கெடுப்பில் ஒவ்வொரு பிரிவிலும் முதல் 10 இடங்கள் பெறும் இடுகைகள் இரண்டாம் கட்டப் பொது வாக்கெடுப்புக்குத் தெரிவு செய்யப்படும். இரண்டாம் கட்டத்தில் அனைத்து வாசகர்களும் (பதிவு இல்லாதவர்களும்) வாக்களிக்கலாம்.

9. பதிவர் வாக்குகளும் வாசகர் வாக்குகளும் 2:1 என்ற விகிதத்தில் முக்கியத்துவம் அளிக்கப்பட்டு மொத்த வாக்குகள் கணக்கிடப்படும். இதில் தேர்வு பெறும் முதல் 5 இடுகைகள் மூன்றாம் கட்ட நடுவர் குழுவின் பரிசீலனைக்கு தேர்ந்தெடுக்கப்படும்.

10. தமிழ்மணம் நிர்வாகம், வலைப்பதிவர்களைக் கொண்ட நடுவர் குழு அமைக்கப்படும். கடந்த ஆண்டு பதிவர்களை நடுவர்களாக நியமிப்பது குறித்து சில மாறுபட்ட கருத்துக்களை சில பதிவர்கள் முன்வைத்து இருந்தாலும் நடைமுறையில் சாத்தியமான நடைமுறைகளையே தமிழ்மணம் பயன்படுத்த விரும்புகிறது. காரணம் விருதுகள் நிகழ்வு ஒரு நீண்ட நிகழ்வு. எனவே நடைமுறை சாத்தியமான நடைமுறைகளையே தமிழ்மணம் பின்பற்றும்.

11. அதே நேரத்தில் விருதுகள் ஒரு இடுகையின் தகுதி அடிப்படையிலேயே தேர்ந்தெடுக்கப்பட வேண்டும் என்ற காரணத்திற்காக நடுவர் குழுவுக்கும் சில விதிமுறைகளை உருவாக்கி இருக்கிறோம். நடுவர் குழுவில் இடம் பெறும் நடுவர்கள் தனித்தனியாக இடுகைகளை தேர்வு செய்து தமிழ்மணம் விருதுக்குழுவிற்கு அளிப்பார்கள்.
தமிழ்மணம் விருதுக் குழு இந்த மூன்று சுற்று வாக்குகளையும் கணக்கில் கொண்டு விருதுகளை அறிவிக்கும். நடுவர்களின் பெயர்கள் இறுதிவரை அறிவிக்கப் படமாட்டாது. விருதுகள் அறிவிக்கப்படும் பொழுது தான் நடுவர்களின் பட்டியில் வெளியிடப்படும். ஆனால் யார் யார் என்ன பிரிவில் நடுவர்களாக இருந்தார்கள் என்ற விபரம் அறிவிக்கப்படமாட்டாது. ஒருபிரிவுக்குள்ளேயும் கூட ஒரு நடுவருக்கு, மற்ற நடுவர்கள் யார் என்பது தெரியது.

12. நடுவர் குழுவில் இடம் பெறும் வலைப்பதிவர்களும் போட்டியில் கலந்து கொள்ளலாம். ஆனால் அவர்கள் கலந்து கொள்ளும் பிரிவில் விருதுகளை தேர்வு செய்ய இயலாது.

13. தமிழ்மணத்தில் இணைந்துள்ள பதிவர்களுக்குப் பரிந்துரைகள் அனுப்புவதற்கான வேண்டுகோள் வெளியிடப்படுவதுடன் விருது தெரிவுப் பணி தொடங்கும்.

14. கிழ்க்கண்ட தேதிகளை பதிவர்கள் குறித்துக் கொள்ளலாம்
– இடுகைகள் பரிந்துரைகளுக்கான காலக்கட்டம் – டிசம்பர் 1 – டிசம்பர் 10
– முதல் கட்ட வாக்கெடுப்பு – டிசம்பர் 11 – டிசம்பர் 20
– இரண்டாம் கட்ட வாக்கெடுப்பு – டிசம்பர் 21 – டிசம்பர் 30
– நடுவர் குழு வாக்கெடுப்பு – சனவரி 1 – சனவரி 10
– விருதுகள் முடிவுகள் அறிவிப்பு – பொங்கல் தினத்தன்று முடிவுகள் அறிவிக்கப்படும்

15. ஒவ்வொரு கட்டத்திலும் விரிவான அறிவிப்புகள் தமிழ்மண முகப்பில் வெளியிடப்படும். மின்னஞ்சலிலும் பதிவர்களுக்கு அறிவிக்கப்படும்.

பரிசு:
தமிழ்மணம் விருதுகள் சிறந்த எழுத்தினை ஊக்குவிக்கவே நடத்தப்படுகிறது. பரிசுத் தொகை ஒரு அடையாளத் தொகை மட்டுமே. அந்த அடையாளத்தை புத்தகங்களாகவே தமிழ்மணம் வழங்கும். வாக்கெடுப்பில் ஒவ்வொரு பிரிவிலும் அதிக வாக்குப் பெற்று முதலிடம் பெறும் பதிவுகளுக்குத் தலா ரூ.1000ம் (ஆயிரம் ரூபாய்), இரண்டாம் இடம் பெறும் பதிவுகளுக்குத் தலா ரூ.500ம் (ஐநூறு ரூபாய்) வழங்கப்படும். பரிசுத்தொகை நூல்களாகவே வழங்கப்படும். பதிவர்கள் தமிழ்மணம் வழங்கும் கூப்பனைக் கொண்டு சென்னை நியூ புக்லாண்ட்ஸ் புத்தகக்கடையில் தாங்கள் விரும்பும் நூல்களைப் பெற்றுக் கொள்ளலாம்

தமிழ்மணம்/திரைமணம் விருதுத் தேர்வு ஒருங்கமைப்புக் குழு

Comments

15 Responses to “தமிழ்மணம் வலைப்பதிவு விருதுகள் – 2011”

  1. நீச்சல்காரன் on November 17th, 2011 11:48 pm

    கலந்து கொள்பவர்களுக்கு வாழ்த்துகள்

  2. நொந்தகுமாரன் on November 18th, 2011 4:28 am

    செய்தி பார்த்து, மகிழ்ச்சியடைந்தேன். இறுதியில் பரிசுத் தொகை படிக்கும் பொழுது, ரூ. 10000/- ரூ. 5000/- என படித்துவிட்டு, சந்தோசமாயிவிட்டேன்.

    பசி நேரம் என்பதால், கண் கட்டிருச்சு என பிறகு தான் அறிந்தேன். பரிசா முக்கியம்? விருது முக்கியம்.

    கடந்த இரண்டு ஆண்டுகளில் என்னுடைய மின்னஞ்சல் குழப்பத்தில், எனக்கு வரவேண்டிய மின்னஞ்சல் எங்கோயோ போய் விழுந்துவிட்டது. இந்தமுறை அந்த தவறு நிகழாது. ஒரு பரிசையாவது தட்டிவிடுவேன் என உறுதியாய் நம்புகிறேன். புத்தகம் வாங்க பணம் தட்டுப்பாடா இருக்கு. :)

  3. mani on November 18th, 2011 10:44 am

    //முண்ணனி//

    spelling mistake

  4. Aathira on November 18th, 2011 11:56 am

    போட்டியில் பங்குபெறுபவர்களுக்கும் பரிசினை பெற உள்ளவர்களுக்கும் மனமார்ந்த வாழ்த்துகள்.

  5. ஜோதிஜி திருப்பூர் on November 18th, 2011 12:26 pm

    வாழ்த்துகள்.

  6. சசிகுமார் on November 19th, 2011 7:52 am

    போட்டியில் கலந்து கொள்ளும் அனைவருக்கும் வெற்றி பெற வாழ்த்துக்கள்.

  7. தமிழ்வழியே எழுதும் பதிவர்களின் திறனை வளர்க்கும் தமிழ்மணத்தின் பணி போற்றுதலுக்குரியது..

    வாழ்க! வளர்க!

  8. பரமசிவம் on November 19th, 2011 12:26 pm

    தமிழ்மணத்திற்கு என் மனம் கனிந்த பாராட்டுகள்.

  9. வீடுசுரேஸ்குமார் on November 19th, 2011 11:08 pm

    ஆவலுடன் காத்திருக்கின்றோம்….

  10. soundarapandiann on November 20th, 2011 1:28 am

    கலந்துக் கொள்பவர்களுக்கும், தமிழ்மணத்திற்கும் என் வாழ்த்துக்கள்…

    படைப்புகளை எப்படி அனுப்பவேண்டும் என்ற விவரம் சரியாக எனக்கு புரியவில்லை…

    நானும் ஆவலோடு இருக்கிறேன்.

  11. Cheena ( சீனா ) on November 20th, 2011 1:37 am

    போட்டியில் பங்கு பெறும் அனைவருக்கும் நல்வாழ்த்துகள். நட்புடன் சீனா

  12. SHANMUGAVEL on November 20th, 2011 12:58 pm

    தொடர்ந்து பதிவர்களை ஊக்குவிக்கும் தமிழ்மணத்திற்கு நன்றி

  13. MHM NIMZATH on November 21st, 2011 3:38 am

    வாழ்த்துகள்!

  14. துவாரகன் on November 21st, 2011 3:08 pm

    தமிழ்மணத்தின் தொடர்ச்சியான பணி மகிழ்ச்சி தருகிறது. போட்டியில் கலந்துகொள்ள ஆவலாயுள்ளோம்.

  15. நம்பள்கி on May 10th, 2012 6:12 pm

    How do we know who all voted for my post?

    Also, when I vote as a plus vote to a particular post both numbers are shown incrementally. For example, some one has 5 plus and 5 minus votes, when I put my plus vote, the screen changes to 6 plus and 6 minus votes, instead of 6 puls and 5 minus votes.

    Could you please let me know why?

Leave a Reply